12.04.2017

ДЕМОКРАТСКИ СОЈУЗ: ДРЖАВЕН УДАР 

Демократскиот сојуз смета дека во Македонија е извршен државен удар, кој и натаму трае и се друго е театар на апсурдот вклучително и репликите во Парламентот. 

Доколку партијата (ВМРО ДПМНЕ) која нема мнозинство и натаму владее и спречува мнозинството од 67 пратеници да избере Влада на Република Македонија, повеќе од јасно е дека се работи за класичен државен удар кој ги има сите полуги да ја држи Македонија во заложништво со тежок и неизвесен расплет. 

Најавите за тоа дека Македонија ќе ја брани народот, дека за таа цел веќе се формирани параполициски сили, тројки и слично, се пропаганден арсенал кој треба да ги плаши граѓаните и парламентарното мнозинство. 

Мнозинството и натаму бара мирен, демократски и Уставен излез од кризата, но грабежот и диктатурата продолжуваат. 

Во вакви услови, кога државниот удар го одржуваат пратениците од ВМРО ДПМНЕ, мора мнозинството да одговори соодветно и седницата на Парламентот да продолжи се додека не се избере претседател на Парламентот и Влада на Република Македонија. 

Работата на Парламентот не смее и не може со сила да биде блокирана. 

Парламентот мора да се заштити и тука одговорноста е и на силите за безбедност, но и на граѓаните кои во корен треба да ги сосечат идеите за насилство. 

Очекуваме пучистите мирно да се повлечат и да овозможат мирен и демократски трансфер на власта. 

Само одговорноста и разумот се гаранција дека Македонија ќе опстои како суверена, самостојна и унитарна држава и ќе започне стабилизација на истата , а животот полека ќе се нормализира.